भैरहवा (स्मार्ट मिडिया)– लुम्बिनी क्षेत्रको पर्यटन प्रवद्र्धन गर्ने उद्देश्यले भैरहवास्थित गौतम बुद्ध अन्तर्राष्ट्रिय विमानस्थलबाट लुम्बिनीसम्म निःशुल्क विद्युतीय बस सेवा सञ्चालनमा ल्याइएको छ। लुम्बिनी विकास कोष र स्थानीय यातायात व्यवसायीको सहकार्यमा यो सेवा सुरु गरिएको हो।
अन्तर्राष्ट्रिय विमानस्थलमा ओर्लिने पर्यटकहरूलाई सिधै बुद्ध जन्मस्थल लुम्बिनीसम्म पुग्न सहज होस् भन्ने हेतुले पाँचवटा अत्याधुनिक विद्युतीय बसहरू सञ्चालनमा ल्याइएको छ। यी बसहरू पूर्ण रूपमा वातानुकूलित र अपाङ्गतामैत्री रहेका छन्।
लुम्बिनी विकास कोषका अनुसार, यो सेवा पहिलो चरणमा तीन महिनाका लागि निःशुल्क गरिनेछ। यसले गर्दा पर्यटकहरूले महँगो ट्याक्सी भाडा तिर्नुपर्ने बाध्यता हट्ने र लुम्बिनीमा पर्यटकको बसाइ लम्ब्याउन मद्दत पुग्ने विश्वास लिइएको छ।
विमानस्थल सञ्चालनमा आएको लामो समयसम्म पनि पर्यटक आवागमन कम देखिएपछि सरकारले यस्ता सहुलियतका कार्यक्रमहरू ल्याउन थालेको हो। यसका साथै, अन्य निजी एयरलाइन्सहरूलाई पनि भैरहवाबाट उडान भर्न प्रोत्साहन गर्न थप सुविधाहरू घोषणा गर्ने तयारी भइरहेको छ।
